Óvænt heimsókn

 

Hvenær varð það siður á Íslandi að börn bönkuðu upp á og heimtuðu nammi í skiptum fyrir rammfalskan söng? Nei ég er ekki svo óheppin að vinna í verslun á þessum degi heldur var ég í mestu makindum í sturtu þegar barið var á dyrum. Þegar enginn kom til dyra var bankað á baðherbergisgluggann hjá mér. Þá taldi ég víst að einhver væri kominn í heimsókn til mín og hentist í ofboði úr sturtunni og klæddi mig á ljóshraða.

Þegar ég opnaði hurðina blöstu við mér tvær skælbrosandi nornir á að giska 10 ára. Nornunum fylgdi nokkru eldri drengur í svörtum ruslapoka. Eins og gefur að skilja þá var gelgjan nokkuð súr á svipinn enda varla eftirsóknarvert að ganga í hús með mun yngri stelpum íklæddur í plast.

Stelpurnar spurðu hvort þær mættu syngja fyrir mig og áður en ég gat stamað því upp úr mér að ég ætti nú ekkert nammi fóru þær að syngja Frost er úti fuglinn minn. Mitt ískalda hjarta bráðnaði við falskan sönginn og ámáttlegan svipinn á unglingnum. Þegar laginu var lokið sagðist ég ætla að athuga hvort ég lumaði á einhverju slikkeríi.

Meðan ég gramsaði í eldhússkápunum eftir jólakonfekti heyrði ég að einhver bættist í hópinn fyrir utan. Þegar ég snéri aftur með gamalt mackintos ( Sorry krakkar ) þá var þar kominn annar stálpaður strákur með kúrekahatt, hárkollu og í frakka.

Nei andskotinn hugsaði ég með mér og spurði hann vantrúuð hvort að hann væri kúreki.

„Nei ég er Gummi í byrginu" sagði strákurinn glaðhlakkalega og uppskar mikið fliss frá mér. Krakkar geta verið snillingar.

Athugasemdir

[Kreppumaður, 6.2.2008 kl. 13:09]

Góður þessi sem var Guðmundur!!!  Vildi óska þess að ég hefði haft rænu á því að dulbúa mig sem hann...

[Gunnar Örn (IP-tala skráð) 6.2.2008 kl. 13:31]

Hehehe!

[Ragga (IP-tala skráð) 6.2.2008 kl. 16:43]

Flottur!

[Fröken M, 7.2.2008 kl. 14:35]

Eins og ég er stundum skotin í kúrekum þá er finnst mér allt í senn alveg stórundarlegt og óþolandi hvað mikið af pervertum sækir í það að vera með kúrakahatta.

[Jóna Á. Gísladóttir, 7.2.2008 kl. 17:01]

hehe nokkuð gott verð ég að segja.

Og talandi um perverta með kúrekahatta... þegar Kompás elti með myndavélarnar á lofti, þarna lögfræðinginn sem varð uppvís af því að nota ungar stúlkur, þá tók ég eftir því að hann var alveg eins klæddur og Guðm. í Byrginu. Með kúrekahatt í einhverjum leður/rússkinnsjakka með gelgjulegri mynd eða áprentun aftan á bakinu. Það er náttúrlega eitthvað að 

[Sigga, 7.2.2008 kl. 23:08]

GARG! Snilldargaur.